Þessi grein er ekki til á íslensku. For the sake of viewer convenience, the content is shown below in the alternative language. You may click the link to switch the active language.
Í síðustu viku stóð ÍSALP fyrir ísklifurnámskeiði fyrir byrjendur. Vel var mætt á námskeiðið, 14 manns á miðvikudagskvöldið og 10 manns á laugardeginu.
Á miðvikudagskvöldinu var farið í gegnum ýmis tæknileg atriðið í klifurhúsinu og á laugardeginum var farið á Sólheimajökul.
Leiðbeinandinn á námskeiðinu var Matteo Meucci og kunnum við honum bestu þakkir fyrir.
Íslenski Alpaklúbburinn býður meðlimum upp á frítt byrjendanámskeið í ísklifri næstu viku. Námskeiðið verður tveir dagar: Miðvikudagskvöldið 7.des kl. 20.00 í Klifurhúsinu (innanhúss) og síðan laugardagur 10.des eða sunnudagur 11.des eftir aðstæðum. Aðalleiðbeinandi námskeiðsins er Matteo Meucci .
Farið verður yfir grundvallaratriði í ísklifri og þátttakendum gefinn kostur á að spreyta sig á sportinu undir leiðsögn reyndra klifrara.
Þátttakendur þurfa að mæta með sinn eigin búnað: ísaxir, belti, hjálm, stífa skó og klifurbrodda, tryggingatól og læsta karabínu.
Takmarkaður fjöldi kemst að á námskeiðinu og fer skráning fram í gegnum tölvupóst stjórnar Alpaklúbbsins (stjorn @ isalp . is). Við svörum um hæl og staðfestum skráningu.
Það er ekki of seint að skrá sig í klúbbinn og taka þátt.
Tvær spannir, fyrri sennilega í kringum M 5 og sú seinni stífari, í kringum M 6/+.
Fyrri spönnin eltir augljósa sprungu utan á nefinu sem skagar út, rétt hægramegin við Fimm í fötu (2) og eru fyrstu tveir metrarnir stífastir. Eftir um 20m af klifri lendir maður á syllu þar sem þægilegt er að gera stans. Seinni spönnin byrjar á að fara upp aðeins hægramegin við stansinn og að augljósri súlu sem lýtur út fyrir að vera laus. Þessi drjóli er samt sem áður nokkuð fastur í bili, sennilega margt annað sem fer niður á undan. Eftir þann kafla er augljós hliðrun yfir slabb með augjóst þak aðeins fyrir ofan. Í lok hliðrunarinnar vippar maður sér í mjög víða sprungu sem er krúxið í allri leiðinni. Mjög snúið er að beita sér í sprungunni, bæði að koma öxum almennilega fyrir og að stíga inn í sprunguna eða reyna að ná hné aðeins inn. Best væri að vera með camalot af stærð 5 til að tryggja þann hluta, 4 gæti mögulega dugað líka. Eftir ca 3m af þessari víðu sprungu tekur við léttara klifur, augljósari grip fyrir axir og brodda en hornið sem maður er inni í er mjög „flared“ og er klifrið áfram snúið upp á topp þó svo að það sé léttara.
Leiðin var frumfarin í dótaklifurs onsight, en planið er að setja eitthvað af boltum í hana. Mikið var af lausu bergi í frumferðinni en stórum hluta var hent niður og ætti leiðin því að vera orðin þokkalega laus við mestu hætturnar.
Nafnið er tilvísun í umdeildan nýkjörinn forseta Bandaríkjana, sem fleygði fram þeirri staðreynd að loftslagsbreytingar væru bara svikamylla búin til af valdamiklium mönnum í Kína. Leiðin var frumfarin 30. nóvember 2016 í nýstandi 3 °C, nánast enginn ís í Múlafjalli og ekki arða af ís í Bryjnudal, nokkuð óvenjulegt miðað við árstíma. Þó svo að þessi mixklifurleið sé alveg þurr, þá er slatti af mosa í henni sem að hefur mjög gott af því að vera klifraður í frosti, það er því ráðlegast að miða á að klifra leiðina í frostaköflum.
FF: Matteo Meucci og Jónas G. Sigurðsson 30.11.2016
Nú er vetur genginn í garð og margir farnir að horfa til fjalla. Það er margt spennandi á döfninni hjá ÍSALP þessa daganna og vonum við til að þetta fréttabréf hvetji meðlimi til að taka þátt.
Jólaklifur ÍSALP og Útgáfuteiti
Jólaklifur hátíð ÍSALP hefur verið mjög vinsæl undanfarin ár og í fyrra mættu hátt í 40-50 manns í Múlafjall. Við stefnum á aðra slíka stórhátíð 17. desember. Mæting verður sem áður á Select/Shell á Ártúnshöfða og lagt af stað þaðan klukkan níu um morguninn.
Síðar um kvöldið, eftir að allir hafa haft tækifæri til skipta yfir í fínni Gore-tex og dúnjakka í öllum regnbogans grunnlitum þá verður skálað í bjór á efri hæð Kaffi Sólon. Hvetjum við alla til að mæta tímanlega enda verður ókeypis bjór á krana, umræða um allskonar fjöll, Pubquiz og síðast en ekki síst verður gefið út Ársrit ÍSALP 2016. Einnig verða sigurvegarar myndakeppninnar kynntir og verðlaun afhent.
Byrjendanámskeið í Ísklifri
Matteo Meucci mun halda námskeið í Ísklifri í aðdraganda Jólaklifurs ÍSALP. Námskeiðið verður ókeypis handa meðlimum ÍSALP og haldið yfir tvo daga. Fyrst verður farið yfir búnað, tækni og öryggisatriði miðvikudaginn 7. desember í sal Klifurhúss Reykjavíkur og laugardaginn eða sunnudaginn eftir það (fer eftir veðri) verður farið út að klifra. Þetta er stórkostlegt tækifæri til að læra undirstöður ísklifurs með einum færasta klifrara landsins. Athugið að námskeiðið verður kennt á ensku. Frekari upplýsingar um skráningu koma síðar.
Brattamálið mikla
Því miður rann tími okkar út til að flytja skálann uppeftir í haust. Við héldum vel sóttan fund um málefni Bratta og samstarf ÍSALP og FÍ í lok ágúst en síðan þá gekk illa að nýta þá fáu veðurglugga sem fengust. Málið er þó alls ekki í dvala því nú hefjast samningaviðræður við FÍ um hvernig skuli eiginlega útbúa þennan skála og óskar ÍSALP eftir skoðunum meðlima á málefnum Bratta á spjallþræði sem opnaður verður innan skamms.
Styrkir frá ÍSALP
Það er góðærisbrjálæði hjá ÍSALP og við viljum hvetja meðlimi til að sækja um styrki til félagsins. Við höfum mikinn áhuga að styrkja meðlimi til BMC International Summer Meet 2017 en við erum opin fyrir öllum tillögum – sér í lagi ef einhver er að skipuleggja íslenskt expedition.
Vestari Hnappur er einn tinda Öræfajökuls og situr á öskjunni sunnanverðri. Hnappurinn er 1851m hár og klifrið hefst í rúmlega 1700m hæð.
Aðkoma: Hnappaleið liggur beint við. Hægt er að keyra upp í 8-900m hæð upp jeppaslóða sem byrjar rétt austan við Foss Hótel Hnappavelli. Þaðan er gengið upp vestan við Stigárjökul upp í um 1200m hæð þar sem komið er á jökul. Jökullinn neðan við Hnapp er heldur sprunginn og geta erfiðleikar í aðkomu farið eftir árstíma og snjóalögum. Ef aðstæður eru erfiðar væri Sandfellsleið einnig möguleiki og þá þyrfti að fikra sig austur eftir öskjubrúninni inn að Hnappnum.
Farið var vestan megin við áberandi hrygg sem liggur niður vegginn og liggur leiðin beint upp vegginn meðfram hryggnum. Klifrið er um 100m í snjó og ís og að því loknu er stutt ganga upp á topp Hnappsins
Í frumferð var klifrið illtryggjanlegt en ísinn í veggnum var ekki hefðbundinn vatnsís heldur hrím bólstrar á klettunum sem hentuðu illa til trygginga. Líklega eru aðstæður oftar en ekki svo.
FF.: Árni Stefán Haldorsen, Freyr Ingi Björnsson og Sveinn Friðrik Sveinsson, 5. nóv 2016.
Systurnar Tashi og Nungshi Malik frá Indlandi fengu Leif Eiríksson Young Explorer Award í vikunni. Stelpurnar eru þekktar sem Everest tvíburarnir (Everest Twins).
Tashi og Nungshi eru aðeins 25 ára gamlar en eru þrátt fyrir ungan aldur eru þær komnar með glæsilega ferilskrá í fjallamennskunni. Þær eru fyrstu systurnar til þess að klifra heimsálfutindana sjö (Seven Summits). Þær eru einnig búnar að ganga seinustu gráðuna á norður og suður pólunum. Með því að klára það urðu þær yngstu einstaklingarnir til að ljúka hinni svokölluðu Explores Grand Slam.
Indveska sendiráðið á Íslandi bauð stjórnarmeðlimum Ísalp í samkomu þar sem stelpurnar héldu fyrirlestur um ævintýri sín. Við spjölluðum við systurnar og vonandi verður hægt að birta viðtal við þær í næsta ársriti Ísalp sem er væntanlegt í desember.
Ísalp meðlimurinn Matteo Meucci hefur hafið verkefnið „Matteo’s 100 Challenge“. Verkefnið gengur út á það að hann ætlar að klifra 100 leiðir í vetur, ýmist ís-, mix- eða alpaklifur og svo ætlar hann að toppa verkið með því að hlaupa 100 km ultra maraþon næsta sumar.
Klifurhluta verkefnisins fylgja nokkrar reglur, eða viðmið sem Matteo setti:
1. Hann má ekki hafa klifrað leiðina áður, hún verður að vera ný fyrir honum.
2. Hver leið telur bara einu sinni, það má ekki klifra sömu leiðina oft.
3. Eins mikið af frumferðum, FF (e. First accent FA) og mögulegt er.
Matteo ákvað að ráðast í þetta verkefni í tilefni af því að hann verður fertugur núna í byrjun árs 2017 og er þetta hans leið til að halda afmælisveislu og að sýna að þó að hann sé að eldast, þá er það engin hindrun þegar kemur að klifri, hlaupum og almennri hreyfingu.
Ísalp ætlar að styðja við bakið á Matteo í þessu verkefni, ásamt öðrum samtökum og fyrirtækjum.
Í undirbúningi fyrir stórt klifur verkefni í vetur mun Matteo Meucci halda fyrirlestur og myndasýningu í Klifurhúsinu næst komandi miðvikudag. Sýningin hefst klukkan átta og mun Matteo fara yfir klifursögu sína bæði hér á Íslandi og í ölpunum en ferill hans spannar um 24 ár.
Hann hefur verið búsettur á Íslandi seinustu 3 árin og nýtt tíman vel við að frumfara nýjar leiðir á Íslandi.
Þetta er myndasýning sem enginn ætti að láta framhjá sér fara! Matteo mun tala á ensku.
Klifurhúsið er við Ármúla 23
Event á Facebook: https://www.facebook.com/events/30069792030971
Ársreikningur síðasta árs verður lagður fram til samþykktar í salnum í Klifurhúsinu kl. 20 á þriðjudaginn. Að því loknu bjóða klúbbfélagar upp á tvær myndasýningar.
Annars vegar mun Ingunn Ósk Árnadóttir segja okkur frá ferð sinni til Wales í sumar þar sem hún tók þátt í alþjóðlegum klifurhittingi kvenna. Hins vegar munu Eysteinn Hjálmarsson og Ævar Ómarsson segja okkur frá nýlegri fjallamennskuferð þeirra til Íran, þar sem þeir klifruðu spennandi alpaklifurleið með íranska klifurlandsliðinu.
Í mars 2016 fóru Spencer Gray og Eythan Sontag frá Bandaríkjunum nýja leið á suðurhlið Hrútsfjallstinda.
Leiðina klifruðu þeir með áhugaverðum hætti. Félagarnir drógu með sér sleða að suðurhliðinni og gistu þar í tjaldi. Daginn eftir klifruðu þeir þrjár spannir í aðalfossinum í leiðinni sem þeir gráðuðu WI5+, WI5 og WI3. Eftir það bívökuðu þeir félagar áður en þeir kláruðu leiðina næsta dag.
Leiðin er vinstra megin við Scotts leið.
Hér er ferðasaga þeirra frá heimasíðu Ameríska Alpaklúbbsins:
In late March, Eythan Sontag and I (both from the U.S.) climbed a new route on the south face of the east summit of Hrútsfjallstindar (“Ram Mountain,” 1,875m) in Vatnajökull National Park. The Hrútsfjalls peaks are situated on a volcanic crater rim at the edge of one of Europe’s largest glaciers, squeezed between outlet glaciers leading toward the coast.
Aðalfundur Íslenska Alpaklúbbisns verður haldinn í Klifurhúsinu, Ármúla 23, þriðjudaginn 13.september kl. 20:00
Dagskrá fundarins er skv. lögum félagsins:
1. Kosning fundarstjóra sem síðan skipar fundarritara.
2. Skýrsla stjórnar.
3. Ársreikningar lagðir fram til samþykktar, undirritaðir af tveimur skoðunarmönnum.
4. Lagabreytingar.
5. Kjör formanns Ísalp og meðstjórnenda.
6. Kjör uppstillingarnefndar.
7. Kjör tveggja skoðunarmanna ársreikninga.
8. Ákvörðun árgjalds næsta árs.
9. Önnur mál.
Atkvæðisbærir og kjörgengir eru þeir einir sem greitt hafa árgjald síðastliðins árs fyrir upphaf aðalfundar. Framboð skulu hafa borist fyrir 3.september en einnig er heimilt er að bjóða sig fram í lausar stöður ef einhverjar eru á aðalfundi.
Allar tillögur um lagabreytingar skulu hafa borist stjórn (stjorn@isalp.is) fyrir 3.september.
Í liðnum „önnur mál“ munum við afgreiða Brattamálið. Nánari kynning á því mun birtast fljótlega.
Lausar stöður meðstjórnenda eru þrjár talsins auk þess sem kosinn verður staðgengill Katrínar Möller, gjaldkera sem á eftir eitt ár af tveggja ára kjörtímabili sínu.
F.h. stjórnar, Helgi Egilsson, formaður
Góður fundur var haldinn seinasta þriðjudag um framtíð Bratta, fjallaskála ÍSALP í Botnssúlum. Fyrir þá sem ekki þekkja til þá á félagið rétt til að hafa skála í Súlárdal, mitt á milli Syðstusúlu, Miðsúlu og Vestursúlu. Skálasvæðið er í um 750m hæð og býður upp á ótal möguleika fyrir félagsmenn til skíðunnar, klifurs og almennrar fjallamennsku. Skálinn stendur á lóð Þingvallarþjóðgarðs sem er einnig gífurlegt gildi fyrir eignina.
Bratti hefur verið í niðurníðslu árum saman og loks var hann tekinn til Reykjavíkur til lagfæringa árið 2011. Fyrir tveimur árum fékk klúbburinn nýjan og veglegan 60fm skála að gjöf frá bílaframleiðandanum Land Rover og kemur sá skáli til með að leysa Gamla-Bratta af hólmi.
Gamli Bratti, mynd frá Ferðafélagi Árnesinga
Bratta-nefnd var skipuð og hefur hún unnið hörðum höndum að því að koma Nýja-Bratta upp í Botnssúlur. Verkið krefst mikilla fjármuna, enda er dýrt að flytja hús uppá fjall og að auki þarf að innrétta skálann algjörlega frá grunni. Í von um að setja félagið ekki á hausinn þá hafa margar lausnir verið íhugaðar. Lengi vel stóð til að selja eina einungu Nýja-Bratta til að fjármagna flutninginn á restinni. Nýji-Bratti er í 3 einingum, 2 híbýli og 1 forstofa, í heild sirka 60fm. Önnur hugmynd sem naut mikilla vinsælda hjá stjórn og Brattanefnd var að leitast eftir samstarfi við fjársterkan aðila í rekstur og flutningi skálans. Að lokum var leitað til FÍ og tóku þau vel í samstarfið. Til stendur að FÍ sjái um allan flutning skálans upp eftir, innréttingu skálans og viðhaldi en á móti kemur að Bratti verður sameign, FÍ muni eiga rekstur skálans á sumrin og ÍSALP á veturna.
Í ljós hefur komið að félagsmenn vilja kanna betur báða kosti áður en endanleg ákvörðun er tekin, hvernig samningsdrög við Ferðafélag Íslands myndu líta út og hvort möguleiki sé á að bjóða upp á raunhæfan valkost varðandi uppsetningu á 36 fm skála í fullri eigu ÍSALP. Stjórn klúbbsins vill því boða til kosninga um málið á næsta aðalfundi ÍSALP. Aðalfundur ÍSALP er haldinn árlega um miðjan september og verða send út fundarboð fljótlega með dagsetningu.
Á fundinum munu Helgi Egilsson og Gísli Símonarson leggja fram fyrstu drög að sameignarsamningi við FÍ. Sveini Fr. Sveinssyni og Frey Inga Björnssyni hefur verið falið að kanna hvort mögulegt er að setja upp valkost þar sem ÍSALP standi sjálft að standsetningu og flutningi á 36 fm. einingu.
Takið eftir að niðurstaða þessara kosninga verður endanleg niðurstaða málsins og gengið verður strax í aðgerðir. Því er gífurlega mikilvægt að sem flestir mæti á fundinn og kjósi því um er að ræða ákvörðun sem mun hafa varanleg áhrif á framtíð ÍSALP.
Ef einhver vill koma skoðunum sínum á framfæri við stjórn ÍSALP varðandi málið eða ef þið hafið tillögur varðandi lausnirnar sem kosið verður um þá viljum við endilega heyra frá ykkur! Hægt er að birta skoðun sína opinberlega á spjallvef ÍSALP eða senda póst á stjorn@isalp.is, sissi@askur.org (Sveinn Eydal) eða helgidvergur@gmail.com (Helgi Egilsson).
Á þriðjudaginn síðasta var haldinn umræðufundur um Bratta. Formaður hélt kynningu um sögu málsins og kynnti samkomulag milli ÍSALP og FÍ sem lesa má um hér á heimasíðunni. Þá hélt Sissi gott erindi um aðra möguleika í málinu. Að kynningum loknum voru umræður um málið. Í alla staði góður fundur og til þess fallinn að skapa breiða sátt um framtíð Bratta. Við ætlum að halda þessum umræðum áfram og stefnum á að hittast þriðjudaginn í næstu viku, 23.ágúst kl. 20 í Klifurhúsinu.
Það hafa orðið töluverðar umræður um framtíð bratta, sjá hér
Til þess að kynna mögulegan samstarfssamning við FÍ (sjá hér) og ræða málið ákváðum við að boða til fundar. Fundurinn verður haldin í salnum í Klifurhúsinu Ármúla 23 þann 9 ágúst klukkan 20:00.
Félögum í Íslenska Alpaklúbbnum býðst að taka þátt í fjallamennsku-sumarbúðum Íranska Alpaklúbbsins 23.- 31.ágúst næstkomandi.
Hápunktur vikunnar verður klifur á fjallið Sabalan (4.811 m) eftir tæknilegri en öruggri leið.
Dagskráin er eftirfarandi:
23.8: Mæting á hótel í Tehran.
24.8: Seinni partinn verður farið til Ardebil sýslu
25.8: Ekið til þorpsins Shabil og gengið í skála
26.8: Ísklifurnámskeið og hæðaraðlögun
27.8: Ísklifurnámskeið og toppadagur á Sabalan
28.8: Lækkun í átt að Shabil og heimsókn til íranskra hirðingja
29.8: Komið til Shabil. Hverabað.
30.8: Borgarrölt um Ardebil, galakvöldverður og transport til Tehran.
31.8: Skoðunarferð um Tehran og prógrammi lýkur.
Hægt er að lengja dvölina og ganga að prógrammi loknu á fjallið Damavand. Þá lýkur ferðinni 8. september.
Umsækjendur skulu vera á aldrinum 18-32 ára. Umsóknir og óskir um frekari upplýsingar skulu sendar á stjorn (hja) isalp.is. Að búðunum standa „Fjallamennsku- og klifursamtök Íran“ og ungliðahreyfing Alþjóðlegu fjallamennsku- og klifursamtakanna (UIAA). Þáttökugjald er 500 evrur en ÍSALP styrkir hvern þátttakanda um 75.000 kr. Stjórn ÍSALP mun velja úr umsækjendum. Umsóknarfrestur er til 1.ágúst, og skráningu á námskeiðið lýkur 5.ágúst.
ÍSALP og Ferðafélag Íslands (FÍ) hafa komist að samkomulagi um sameiginlegt eignarhald og rekstur á fjallaskálanum Bratta sem til stendur að flytja í Súlnadal í Botnssúlum. Samkomulagið er svohljóðandi:
ÍSALP leggur til skálann í núverandi mynd og mun FÍ ábyrgjast að koma skálanum á sinn stað og bera allan kostnað af uppsetningu hússins, þar með talið flutning, þarfagreiningu, hönnun, vinnu við innréttingu og uppsetningu. Stefnt er að því að skálinn verði kominn upp og tilbúinn til notkunar vorið 2017. Eignarhlutur fjallaskálans mun skiptast jafnt milli félaganna tveggja. Tekjur af gistingu í skálanum skulu renna til viðhalds og uppbyggingar skálans og að öðru leyti til ÍSALP. Formlegur samningur um notkun skálans mun liggja fyrir 15.september 2016.
