Gerðu áhugamál að atvinnu!

[2906647999]

Ágæti viðtakandi!

Mig langar til að vekja athygli félaga í Íslenska Alpaklúbbnum á námi sem boðið er í ferðamáladeild Háskólans á Hólum. Við teljum að námið hér og lífið á Hólum höfði til fólks sem hefur áhuga á útivist og ýmsri afþreyingu sem tengist náttúrunni. Nú þegar hefur björgunarsveitarfólk, leiðsögumenn, fararstjórar, ferða- og fjallafólk sótt námið og líkað vel. Það er ekki síst fyrir þeirra hvatningu að ég hef samband við ykkur.

Í ferðamáladeild Háskólans á Hólum er boðið upp á nám til BA-gráðu í ferðamálafræði þar sem áhersla er lögð á afþreyingu, náttúru og menningu. Einnig er hægt að taka eins árs nám og öðlast þá diplómagráðu í ferðamálafræði ásamt landvarðarréttindum og staðarvarðarréttindum. Möguleiki er á að taka diplómaárið í fjarnámi.

Námið er bæði fræðilegt og verklegt. Hagnýt verkefni miðuð við raunverulegar aðstæður eru stór hluti námsins og nýtast vel þegar út í atvinnulífið er komið. Í náminu er fjallað um afþreyingu, útivist og upplifun, leiðsögn, umhverfi ferðamanna, mat, gistingu, menningu, náttúru, sem og ferðafræði, bókhald, aðferðafræði, rekstrarfræði og markaðsfræði.

Í Skagafirði eru möguleikar á margs konar útivist. Stutt er í skíðasvæðið í Tindastóli, í Skagafirði er hefð fyrir fljótasiglingum í Jökulánum, ekki þarf að fara langt í ísklifur og Tröllaskaginn er gósenland fjallamannsins. Á Sauðárkróki er sjókayak-klúbbur. Nærumhverfi Hóla er fallegt og þar eru margar gönguleiðir. Þetta umhverfi er beint nýtt í tengslum við námið en einnig er ljóst að það er hægt að hafa nóg að gera á milli þess sem legið er yfir bókum!

Mig langar að hvetja ykkur félaga í Íslenska Alpaklúbbnum sem hafið áhuga á að gera áhugamál ykkar að atvinnu að íhuga þann möguleika að koma til Hóla. Á vef skólans eru ítarlegar upplýsingar og námskeiðslýsingar sem segja ykkur enn meira um námið og lífið á Hólum. Vefslóð Háskólans á Hólum er http://www.holar.is

Nánari upplýsingar veitir Guðrún Þóra Gunnarsdóttir deildarstjóri (ggunn@holar.is). Nemendur eru einnig tilbúnir til spjalls.

Með kærri kveðju frá Hólum,
Sólrún Harðardóttir (solrun@holar.is)

[1606805639]

Langar til að taka undir með Sólrúnu. Námið á Hólum er virkilega líflegt og skemmtilegt. Það er brotið upp með skemmtilegum vettvangsferðum og oft er nemendum boðið á ráðstefnur og fyrirlestra.

Kennarar á Hólum leggja mikið upp úr því að fá gestakennara á svæðið. Nokkrir fjallamenn hafa verið þar á meðal t.d. Björn Vilhjálmss, Jón Gauti, Jökull Bermann og Jón Heiðar. Þeir hafa haft frá mörgu að segja og haldið magnaða fyrirlestra.

Ég er nú að ljúka öðru ári og hef starfað á sumrin við leiðsögn á fjöllum. Námið hefur komið að góðum notum á þeim vettvangi, og oft á tíðum hef ég getað tengt skólaverkefnin beint við starfið. Námið hefur líka opnað huga minn og ég hef kynnst fullt af frábæru fólki.
Margir möguleikar eru að loknu námi bæði framhaldsnám og í atvinnumálum því ferðaiðnaðurinn fer ört vaxandi.

Ef ég get svarað einhverjum spurningum endilega sendið á Vilborgarna@gmail.com

Kv, Villý

[Author]

Posts