Ársrit Ísalp 2008

Jæja, þá er vetrartímabilinu að ljúka og því tími kominn á að hefja vinnu við nýtt ársrit klúbbsins.
Eins og komin er hefð á mun blaðið spanna frá sumarbyrjun 2008 (þaðan sem frá var horfið í síðasta blaði) og fram á vetrarlok 2009.

Fyrir hönd ritnefndar óska ég hér með eftir efni frá félögum því án kjarnorkuefnis er lítið varið í snepilinn.
Greinar þurfa ekkert endilega að vera frá 2008/2009. Aðal málið er að þær séu fræðandi, skemmtilegar og helst myndrænar, eða alla vega eitt af þessu þrennu.
Ítreka það sem oft hefur verið sagt að greinar í ritinu þurfa ekkert endilega að fjalla um einhver stórkostlega stálhreðja afrek upp testósterón leiðir sem enginn mun nokkurn tímann þora að klifra aftur. Tökum glaðir við mannlegum greinum um fólk á fjöllum með gleðina við völd, sakar ekki ef það er á spennandi svæði sem fólk gæti fýst í að vita meira um.

Auglýsi einnig eftir upplýsingum í annál íslenskrar fjallamennsku 2008/2009. Við erum búnir að safna saman einhverjum af helstu afrekunum en það gleymist alltaf hellingur. Nýjar leiðir, útlandatúrar etc. er alltaf áberandi í annálnum.

Auglýsi enn fremur eftir forsíðumynd. Það hefur verið viðrað að hafa klettaklifurmynd á forsíðunni í ár en það er þó ekki niðurneglt. Óþarft er að taka fram hvílíkur heiður það er að eiga forsíðumynd á þessu goðsagnakennda blaði…

Efni sendist á ritnefnd(hjá)isalp.is (minnir mig) sem fyrst!